KILA nafsi itaonja mauti! Pumzika mahali pema peponi Adam Philip Kuambiana. Tasnia ya filamu imepoteza mtu muhimu, wewe ulikuwa ufunguo na daraja kwa wasanii.
Kuambiana aliyezaliwa mwaka 1976 Ifunda mkoani Iringa, alikuwa na vipaji vingi, alikuwa mwigizaji, muongozaji na pia mwandishi mzuri wa miswada ya filamu (script).
Elimu yake ya msingi aliipata katika Shule ya Mlimani jijini Dar, baadaye Sekondari ya Tambaza kisha akahamia jijini Nairobi kwenda kusoma kidato cha tano na sita.
Alipofika jijini Dar kwa mara ya kwanza na kurekodi sinema ya kwanza (Sauti ya Manka), uwezo wake ulianza kuonekana kwa waigizaji wengine kutokana na ‘u-serious’ wake kwenye kazi.
Kabla ya kuanza kuongoza filamu, mkali huyo alikwenda kusomea masuala yahusuyo filamu nchini Afrika Kusini, ndipo moto wake ulipokuja kuonekana katika tasnia hiyo.
Kuonesha alikuwa ni jembe, Kuambiana alipenyeza cheche kwenye uongozaji wa filamu ambapo ndani ya muda mfupi tu, alianza kupokea dili mbalimbali za kuongoza filamu na wasanii wengi wakubwa wakaanza kumtumia.
Miongoni mwa kazi nzuri na za heshima ambazo Kuambiana ameziacha ni Sinema ya Sauti ya Manka ambayo ilitokana na wimbo wa Sauti ya Manka wa msanii Gwamaka Kaihula ‘GK’.
Mwenendo wake mzuri na uwezo wake ulidhihirika katika Filamu ya Regina ambayo ilipendwa na wengi kutokana na umahiri mkubwa wa kuzitendea haki ‘sini’ zake, kiasi cha kushindwa kutofautisha kama anaigiza au ndiyo hali halisi.
Kuambiana alikuwa na uelewa mzuri wa Lugha ya Kiingereza, kitu ambacho kiliongeza ufanisi wake katika kazi, achilia mbali kozi fupifupi za sanaa ambazo alisomea ndani na nje ya nchi.
Nikiwa kwenye taaluma yangu ya uandishi wa habari, niligundua kuwa umaarufu wa Kuambiana ulikuwa mkubwa zaidi kwa wasanii wenzake kuliko wafuatiliaji au mashabiki wa kawaida wa sinema za Kibongo.
Nyota huyo alikuwa akisifiwa sana na wasanii, wengi walikuwa wakifanya naye kazi kimyakimya pasipo ‘media’ kujua thamani yake, ndiyo maana ilikuwa rahisi kwa watu kumjua zaidi mwigizaji kama Wema Sepetu lakini na si yeye.
Kutokana na desturi ya Watanzania wengi kutothamini mchango wa mtu akiwa hai, Kuambiana ambaye alikuwa akistahili tuzo za heshima kutokana na kazi zake, hakupata tuzo nyingi mpaka anafariki.
Waandaaji wa tuzo mbalimbali walimpotezea kana kwamba hawamuoni.
Kwa wasanii wa kizazi kipya cha filamu, Kuambiana alikuwa kimbilio la wengi kwani alikuwa si mtu wa kujiona wa gharama, amewasaidia wengi kuandaa miswada, kuigiza na hata kuongoza.
Hadi mauti yanamkuta, Kuambiana alikuwa akishuti muvi ya Jojo waliyoshirikiana na mwanamuziki mkongwe na muigizaji, Stara Thomas ambaye anamzungumzia marehemu kuwa alikuwa mhimili mkubwa sana katika kampuni yake ya kuzalisha filamu.
Miongoni mwa sinema ambazo marehemu ametia mkono wake kwa kiwango kikubwa ni pamoja na Fake Pastor, Life of Sandra, Faith, More Fire, Scola, Lost Sons, My Fiance, Jesica, Basilisa, No Body, Chaguo Langu na nyingine kibao.
Kuambiana alipatwa na umauti alfajiri ya Mei 17, mwaka huu katika Gesti ya Silvarado iliyopo maeneo ya Sinza, jijini Dar na anatarajiwa kuagwa kesho (Jumanne) katika Viwanja vya Leaders na kuzikwa katika Makaburi ya Kinondoni.
Credits to Global Publishers.
No comments:
Post a Comment